طريقة إعداد الملوخية بالجمبري

المكونات :

قلقاس _ خضرة ( سلق وكسبرة خضراء ) _ توم مفروم _ ملح وفلفل إسود _ كسبرة ناشفة _معلقة سمنة بلدى _ شوربة حلوة ( يفضل شوربة لحمة ) _عصير ( ٣ ) ليمونات

** تنضيف القلقاس

_معايا (فوطتين ) نضاف ...امسك القلقاسة بفوطة وأبدا أقشرها وأشيل أى جزء مش حلو

_وبعد ما أخلص القلقاس اللى حأعمله ...أمسكه أمسحه كويس قوى بالفوطة التانية ....ولازم تكون ايدى والسكينة اللى بقطع بيها ناشفة تماما

_أقطع القلقاس مكعبات زى مافى الصور ...مكعبات حجمها وسط

_أحضر الحلة فيها كمية ماية مناسبة وأحطها على النار ولما تغلى أنزل فيها بعصير الليمون وبعد غلوة

_أنزل فى الماية القلقاس ....و أقلب فيه ولما يبدأ يطلع( الريم الأبيض ) أشيله ( هو ده المادة الممزلقة اللى فى القلقاس) ...كل مايطلع الريم أشيله ...الخطوة دى تآخدوحوالى( ٥ :٧) دقايق

_حلاقى الماية ( بتروق ).. أصفى القلقاس من الماية

_ أغسل الخضرة بعد تنضيفها ( بآخد بس الورق بتاع السلق وزهرة الكسبرة ) ...وأخرطهم بالسكينة

_أضع الخضرة فى طاسة على النار وأقلب فيها لغاية لما تهبط خالص ...هنا بقى أضيف معلقة السمنة البلدى وأشوح الخضرة ..وبعد ماتتدبل خالص وتتبخر مايتها أضيف التوم ( كده بحافظ على ريحة التوم ) واقلبه على الخضرة وأضيف شوية فلفل اسود وشوية كسبرة ناشفة ...وأكمل تشويح

_عندى شوربة دسمة بتغلى على النار ....أضيف لها الخضرة اللى شوحتها ( وخلى بالك ده قبل إضافة القلقاس ) ....الخضرة تآخد غلوتين تلاتة وريحتها تطلع وأظبط الملح والفلفل

_أضيف بقى القلقاس وأخليه يكمل تسوية فى الشوربة ( غالبا ٨ دقايق كمان ) وأطلع مكعب وأشوف تسويته

_ بأطفى عليه وهو لسه مش مستوى قوى ....علشان سخونة الشوربة بتكمل تسويته ....وكده مايتهريش

ملاحظات :

_الطريقة دى بيفضل القلقاس شوربته روعة ومش بتتخن

_لو عايزة تخزنى قلقاس ....يبقى بعد ماتصفيه من الماية المغلية اللى بالليمون ...خليه يبرد خالص ...واحفظيه فى كيس وجمديه فى الفريزر ...ولما تحتاجيه ...تعملى الشوربة ولما تغلى بالخضرة ضفيه عليها مجمد

_ طبعا عادى يبقى فى الشوربة اللحمة ....بس احنا بنحب اللحمة محمرة جانبا

_فى ناس بتعمله بطريقة تانية ...الخضرة تضرب فى الخلاط مع نصف كوب ماية ....وبعدين تتصفى ...السائل الأخضر ينزل على الشوربة اللى فيها ليمون ....ويآخدوا التفل من المصفى يحمروه ويضيفوه على الشوربة ( مش بيعملوا خطوة سلق القلقاس الأولى والتخلص من الماية ) ..بس فى الطريقة دى بتبقى شوربته لونها أخضر زرعى ...ودى مش طريقتى الصراحة

_مدة تسوية القلقاس الحلو لا تتعدى ربع ساعة ....علشان كده بقسمها مابين سلقه نصف سلقة فى ماية الليمون ...وأكمل التسوية فى الشوربة مع الخضرة ....

_.يارب الطريقة تعجبكم وتجربوها وتدوقوا أحلى قلقاس ...وبالهنا والشفا ( وما توفيقى إلا بالله)